संघीयता अध्ययन यायेत नेता हानं बेलायतय्
येँ (सन्ध्या टाइम्स)/नेपाः संघीय गणतान्त्रिक जुइधुंकूगु अवस्थाय् आः गुकथंया संघीय प्रणाली लागू यायेगु धइगु बारे अध्ययन यायेत थीथी राजनीतिक दलया नेता नापं संविधानसभाया दुजःत थीथी देशया अध्ययन भ्रमणय् क्रम जारी हे दनि ।
थ्व झ्वलय् लिपांगु इलय् वयाः संविधानसभाया मू मू स्वंगू दल एकीकृत माओवादी, नेपाली कांग्रेस व नेकपा (एमाले)या निगूगु पुस्ताया नेतातय् छगू पुचः थौं बेलायतपाखे वंगु दु ।
बेलायतय् न्यान्हुया भ्रमणय् वंगु पुचलय् एकीकृत माओवादीया न्वकु नारायणकाजी श्रेष्ठ (प्रकाश), कांग्रेसया महामन्त्री प्रकाशमान सिंह व एमालेया सचिव विष्णु पौडेल दुथ्याः। वय्कःपिं थौं सुथय् सवा १० बजेया उडानं उखे वंगु खः ।
भ्रमणया झ्वलय् नेतातय्सं दक्षिण एसिया सम्बन्धी विदेश नापं राष्ट्रमण्डल ज्याकूया संसदीय उपमन्त्री अलिस्टेर बर्ट व अन्तर्राष्ट्रिय विकास राज्यमन्त्री एलन डङकन नापं मेमेपिं मनूतय्त नापलाइगु खँ बेलायती दूतावासं धाःगु दु।
थ्व हे दथुइ थौं नेपाःया नितिं बेलायती राजदूत जोन टुकनोटं नेपाःया नेतातय्गु बेलायत भ्रमण नेपाःया नितिं महत्वपूर्ण व उपलब्धिमुलक जुइगु विश्वास नं प्वंकादीगु दु ।
