बाराय् अपहरण जूम्ह शिक्षकया हत्या
येँ (सन्ध्या टाइम्स)/बाराया महेन्द्र आदर्श जयनगर च्युँटाहा गाविस वडा नं. ९ या खजुरीयाया शिक्षक सुरेश पटेलयात अज्ञात मनूतय्सं वंगु चान्हय् गोलीं कयेकाः स्याना बिउगु दु। वंगु चान्हय् १० बजे ४० दँ दुम्ह शिक्षक पटेल मोटरसाइकलं सिम्रौनगढपाखें थःगु छेँय् वनाच्वंगु इलय् छथ्वः अज्ञात मनूतय्सं अपहरण यानाः गोलीं कयेकाः स्याना बिउगु खः ।
अपहरणकारीतय्सं वय्कःयात जमुती धइगु खुसिइ स्याना बिउगु जुइमाः धकाः प्रहरीं अनुमान याःगु दु। अथे अपहरणया घटनायात कयाः पटेलयात अपहरण याःगु इलय् मोटरसाइकलया लिउने च्वनावंम्ह ३५ दँया सुजित कोइरीयात न्यनेकनेया निंतिं प्रहरीं नियन्त्रणय् काःगु दु।
बीआर २२ ईओ ३५५ नम्बरया भारतीय मोटरसाइकलं छेँय् वयाच्वंगु इलय् उमित अपहरण याना यंकूगु खः ।
अपहरणकारीतय्सं कोइरीयात ल्हाःतुति चिनाः तयातःगु व पटेलयात धाःसा गोलीं कयेकाः स्याना बिउगु खः धाःगु दु। थ्व हे दथुइ उगु घटनायात भूमिगत अखिल तराई मुक्ति मोर्चाया सेक्रेटरी जेके सिंहं जिम्मेवारी काःगु दु ।
