एमालेयात राष्ट्रिय सहमति बाहेकया निर्णय मान्य मजुइगु
नेकपा एमालें प्रधानसेनापति प्रकरणय् राष्ट्रिय सहमति बाहेकया निर्णय मान्य मजुइगु निर्णय याःगु दु ।
आइतवाः पार्टी ज्याकू बल्खुइ च्वंगु स्थायी कमिटीया बैठकं प्रधानसेनापतिया खँय् छुं नं निर्णय काये न्ह्यः प्रमुख दलत दथुइ राष्ट्रिय सहमति कायम यायेमाःगु निर्णय याःगु दु । प्रधानसेनापतियात कारवाही याये व मयायेगु धकाः निर्णय यायेत च्वंगु बैठकय् पार्टी नेतातय् मत बिभाजन जूगुलिं एमालें राष्ट्रिय सहमति बः ब्यूगु खः ।
बैठक लिपां पत्रकारत नाप खँल्हानादिसें एमाले महासचिव ईश्वर पोखरेलं राष्ट्रिय सहमति कथं मयाःगु निर्णय एमालेयात स्वीकार्य मजुइगु खँ धयादिल । अथेहे वयेकलं एमालें थ्व बारे माओवादी, कांग्रेस लगायतया दलत नाप सहलह न्ह्याकातुं च्वनेगु निर्णय याःगु जानकारी बियादिल ।
प्रधानसेनाति रुक्मांग कटुवालयात सरकारं स्पष्टिकरण कायेधुंकाः अप्वयावंगु विवादय् सरकारं एमालेया निर्णयया प्रतिक्षा यानाच्वंगु खः ।
