कार्यकारी प्रमुखया नेतृत्वय् संवैधानिक संयन्त्र
न्हूगु संविधानय् प्रधानन्यायाधीश व संवैधानिक निकायया पदाधिकारीत नियुक्त यायेत गठन याइगु संवैधानिक संयन्त्रया नेतृत्व देय्या कार्यकारी प्रमुखयात देय्कीगु सहमति जूगु दु ।
संविधानसभाया विवादित विषयत ज्यंकेत गठन जूगु उच्चस्तरीय कार्यदलया आइतवाः च्वंगु बैठकं न्हूगु संविधानय् देय्या कार्यकारी प्रमुख राष्ट्रपति वा प्रधानमन्त्री सु जुइगु धइगु निर्णय मजुनीगुलिं संवैधानिक संयन्त्रया प्रमुखय् कार्यकारी प्रमुख जुइगु धकाः जक सहमति जूगु खः ।
माओवादीं संवैधानिक संयन्त्रया प्रमुख सभामुख जुइमाःगु प्रस्ताव तःगु खःसा मेमेगू दलं संयन्त्रय् कार्यकारी प्रमुख हे जुइमाःगु अडान काःगु खः । उगु संयन्त्रय् सभामुख नापं प्रधानन्यायाधीश, विपक्षी दलया नेतायात नं दुजः कथं तयेगु सहमित जूगु दु । तर थुकी थप सु सु च्वनीगु धइगु बारे सहलह जुइ ल्यं दनीगु धाःगु दु ।
कार्यदलया मेगू बैठक सोमवाः सुथय् ८ बजे हानं च्वनीगु जूगु दु ।
