'विदेशी रिमोट कन्ट्रोलं प्रम ल्ययेमबिल'
एकीकृत नेकपा (माओवादी)या नायः पुष्पकमल दाहाल 'प्रचण्डं' विदेशी रिमोट कन्ट्रोलं नेपालय् प्रधानमन्त्री ल्ययेत पंग थनाच्वंगु धयादीगु दु ।
नेपाल संवत् ११३१ न्हूदँया लसताय् माओवादी १० नं निर्वाचन क्षेत्रं याःगु तुच्चा ज्याझ्वलय् नायः प्रचण्डं विदेशी हस्तक्षेपया कारणं हे थः प्रधानमन्त्री जुइमफुगु धयादिल । वय्कलं प्यक्वःगु चरणय् थः प्रधानमन्त्री जुइगु निश्चित जूगुलिं विदेशी दूत आकाझाकां नेपाः वयाः लिच्वः हिलाब्यूगु दावी यानादिल ।
वय्कलं भारत नाप न्हूगु कथं सम्झौता यायेमाःगु धयादिसें अज्याःगु सम्झौताय् नेपाःमि नापं भारतीयतय् हित जुइगु खँ दुथ्याके माःगु धयादिल । तर अज्याःगु सम्झौता यायेत भारत तयार मदुगु वय्कया धापु दु ।
वय्कलं संघीयता, धर्मनिरपेक्षता व गणतन्त्र संस्थागत यायेमबीत चलखेल जुयाच्वंगु धयादिसें थुकी सचेत जुइत फुक्कसितं इनाप यानादिल ।
