येँ-सिक्किम मोटरसाइकल र्याली
येँ (सन्ध्या टाइम्स)/ने.सं. ११३१ न्हूदँया लसताय् येँनं भारतया सिक्किम तक मोटरसाइकल र्याली न्ह्याकीगु जूगु दु। येँया नेवाः भोलिन्टियर्सया ग्वसालय् उगु र्याली यायेत्यंगु खः। थुकिया निंतिं नेवाः भोलिन्टियर्सया संयोजक मनोज नेवाः खड्गी लगायतया छगू पुचः आः नकतिनि सिक्किम वनाः अनया सिक्किम नेवाः गुथिलिसे खँ ब्याका वःगु खः। पुचलय् सम्पर्क व्यक्ति कथं दुथ्याःम्ह भाजु गणेशराम लाछिं कनादी कथं र्याली बारे सिक्किम नेवाः गुथिया नायः रोहित प्रधान व मूछ्यांज्ये दिलु प्रधान नापं सिक्किम सरकारया युवा, खेलकुद तथा शिक्षा मन्त्री एन.के. प्रधानलिसे खँल्हाबल्हा जूगु खः। र्याली न्ह्याकेगु ई व ज्याझ्वः बारे गुथिया बैठकं निर्णय यायेगु खँ धाःगु दु। उगु इलय् सिक्किमया छम्ह नेवाः व्यक्तित्वयात नेपाःपाखें व नेपाःया छम्ह नेवाः व्यक्तित्वयात सिक्किमपाखें हनेगु ज्या नं यायेगु खँ जूगु दु ।
