हत्या विरुद्ध सरकारी ज्याकू बन्द
येँ (सन्ध्या टाइम्स)/महोत्तरी जिल्ला शिक्षा ज्याकूया कर्मचारी लालकिशोर झायात म्हिगः गोलीं कयेकाः स्याना बिउगु विरोधय् थनिंनिसें महोत्तरीइ अनिश्चितकालीन सरकार ज्याकू बन्द याःगु दु ।
हत्यारायात ज्वनाः कारवाही यायेमाःगु, सुरक्षाया ग्यारेन्टी यायेमाःगु, मदुम्हेसिया परिवारयात उचित क्षतिपूति बीमाःगु माग यासें कर्मचारी संघ संगठनत जानाः थनिंनिसें सरकारी ज्याकू बन्दया आह्वान याःगु खः ।
बन्द आह्वानं यानाः महोत्तरी जिल्लाया फुक्क हे सरकारी ज्याकू ठप्प जूगु दु। जनकपुर नगरपालिका वडा नं. ७ य् छेँ दुम्ह झा म्हिगः सुथय् ज्याकूपाखे वनेत्यंगु इलय् गोलीं कयाः घाःपाः जूगु खःसा वय्कःयात वासः याकेत येँय् हःगु खःसां म्वाके धाःसा मफुगु खः ।
उगु हत्या काण्डया जिम्मा तराईया राजन मुक्तिं नेतृत्व यानाच्वंगु जनतान्त्रिक तराई मोर्चां कःगु दु। तर प्रहरीं धाःसा उगु मोर्चाया सुं नं कार्यकर्तायात आः तक च्वने फुगु मदुनि ।
