मिसा उद्यमितय् हस्तकला ब्वज्या
येँ (सन्ध्या टाइम्स)/आय आर्जनपाखें मिसापिं उद्यमितय्त आर्थिक रुपं सशक्तीकरण यायेगु ताः तयाः मिसापिं उद्यमितपाखें उत्पादित थीथी हस्तकला ज्वलंया ब्वज्या याइगु जूगु दु। कन्हय् शनिवाः त्रिपुरेश्वरया बैठक भेन्युलय् जुइगु उगु ब्वज्याय् मिसापिं उद्यमिपाखें उत्पादित वसः, थानातःगु ज्वलं, भ्वंया ज्वलं, वहःया ज्वलंया नापं थीथी कथंया नसात्वँसात नं दइगु खँ ग्वसाः खलकं धाःगु दु। ब्वज्याय् हस्तकला ज्वलंया ब्वज्या व मीज्या नं जुइगु खँ धाःगु दु ।
काठमाडौं बिजिनेस एण्ड प्रोफेसनल विमेन व विमेन एशोसियसन फर ट्रेनिङ्ग एण्ड सर्भिस नांगु निगू मिसा उद्यमि संस्था जानाः थ्व ज्याझ्वः यायेत्यंगु खः। थ्व ब्वज्यापाखें देय्या मिसापिं उद्यमितय् उत्पादनयात प्रवर्द्धन यायेगु, स्वापू क्वातुकेगु व थुकिया म्हसीका बीगु ताः तयागु खँ केबीपीडब्लुया नकिं लक्ष्मीकेशरी मानन्धरं कनादिल ।
