झिंप्यक्वः तक बुसां पौडेलं अझ निरन्तरता बीगु

प्रधानमन्त्री निर्वाचनया याकः उम्मेदवार नेपाली कांग्रेसया रामचन्द्र पौडेल थौं झिंप्यक्वःगु खुसी नं पराजित जुयादीगु दु । झिंप्यक्वः तक प्रधानमन्त्री निर्वाचनय् बुसां वय्कलं निर्वाचनया झ्वःयात अझ निरन्तरता बीगु जूगु दु ।

म्हिग निसें न्ह्याःगु कांग्रेसया केन्द्रीय दुजःतय् बैठकं थःपिंसं तःगु प्यंगू बुँदे मागय् दलत दथुइ सहमति मजुइकं उम्मेदवारी लितमकायेगु खँ लिसाः काःगु दु । शुक्रवाः च्वंगु बैठक लिपा कांग्रेस नेता अर्जुननरसिंह केसीं प्यंगू बुँदाय् सहमति मजुतल्ले उम्मेदवारी कायम हे जुइगु अडान कयादिल ।

उखे थौं व्यवस्थापिका संसदय् झिंप्यक्वःगु खुसी जूगु निर्वाचनय् पौडेल हानं बूगु खः । वय्कया पक्षय् ९६, विपक्षय् २ व तटस्थय् ४० मत लाःगु खः । आः मेगू निर्वाचन कात्तिक १५ गते यायेगु निर्णय याःगु दु ।