न्यायाधीशया नियुक्ति स्वतन्त्र निकाय पाखें यायेगु सहमित
न्हूगु संविधान निर्माणय् खनेदुगु विवाद ज्यंकेत गठन जूगु उच्चस्तरीय राजनीतिक कार्यदलं प्रधानन्यायाधीश व मेमेपिं न्यायाधीशया नियुक्ति संवैधानिक परिषद वा न्याय परिषद थंज्याःगु मेगू स्वतन्त्र निकायया सिफारिसय् यायेगु सहमति याःगु दु ।
सिंहदरवारय् शुक्रवाः सुथय् च्वंगु कार्यदलया बैठकं शक्ति पृथकिकरणया सुद्धान्त कथं न्यायापालिकायात स्वतन्त्र तयेगु निर्णय याःगु खः । तर बैठकं न्यायाधीश नियुक्त यायेगु अज्याःगु स्वतन्त्र निकायया नां व संरचनाया बारे धाःसा निर्णय मयानी । थुकीया बारे शनिवाः च्वनीगु बैठकं निर्णय याइगु धाःगु दु ।
बैठकय् माओवादीं लचकता क्यनेवं दलत दथुइ न्हूगु संविधान निर्माणया झ्वलय् खनेदुगु छगू प्रमुख विवादीत विषयलय् सहमति जूगु खः । थ्वस्वयां न्ह्यः माओवादीं व्यवस्थापिका संसदया समितिं न्यायाधीश नियुक्त यायेमाःगु माग तयाच्वंगु खःसा मेमेगू दलं स्वतन्त्र निकायया सिफारिसय् न्यायाधीश नियुक्तया प्रावधान तयेमाःगु अडान काःगु खः ।
