कार्यदलया बैठक निष्कर्षहिन
येँ (सन्ध्या टाइम्स)/न्हूगु संविधान निर्माणया निंतिं जुयाच्वंगु विवाद ज्यंकेत २७ दलया सहमति कथं दयेकूगु उच्चस्तरीय राजनीतिक कार्यदलया थौं सुथय् च्वंगु बैठक बिना निर्ष्कष क्वचाःगु दु ।
थौं सुथय् ८ बजे च्वनेगु धयातःगु उगु बैठक ९ बजेनिसें
राज्य व्यवस्था समितिया ज्याकुथी च्वंगु खः। थ्यंमथ्यं साढे १ घण्टा बैठक च्वनेवं नेपाली कांग्रेसं थौं थःपिनि औपचारिक केन्द्रीय कमिटीया बैठक दुगुलिं बैठक स्थगित यायेगु प्रस्ताव तःगु खःसा वयां लिपा बैठक छुं हे खँ क्वःछी मलायेकं क्वचायेकूगु खः ।
आः मेगु बैठक कन्हय् ८ बजेनिसें च्वनीगु जूगु दुसा व सिबें न्ह्यः ७ बजेनिसें हे उच्चस्तरीय नेतातय्गु दथुइ विवाद जुयाच्वंगु विषययात ज्यंकेगु बारे सहलह जुइ धाःगु दु। थौंया बैठकय् आः तकया दुने ग्वाहालि पुचलं याःगु ज्या नापं विवाद जुयाच्वंगु विषय व सहमति जूगु विषययात कयाः सहलह ब्याकेगु ज्या जूगु खः ।
