प्याकेजय् सहमति लिपा जक उम्मेदवारी लितकायेगु : कांग्रेस
नेपाली कांग्रेसया १२क्वःगु महाधिवेशन लिपा च्वंगु न्हापांगु केन्द्रीय दुजःतय् बैठकं शान्ति व संविधानया बारे प्याकेजय् सहमति मजुइकं प्रधानमन्त्रीया उम्मेदवारी लितमकायेगु निर्णय याःगु दु ।
कांग्रेसया मू ज्याकू सानेपाय् बिहीवाः पार्टी सभापति सुशील कोइरालाया सभापतित्वय् च्वंगु बैठकं शान्ति प्रकृया पूवंकेगु प्रतिबद्धता, लोकतान्त्रिक संविधानय् सहमति, सत्ता साझेदारी व सु प्रधानमन्त्री जुइगु धइगु बारे प्याकेजय् हे सहमति यायेमाःगु निर्णय याःगु खः ।
बैठकय् महाधिवेशनया समिक्षा, पदाधिकारीतय् मनोनयन, निर्वाचन प्रतिवेदनया बारे नं सहलह जूगु खः । नापं महाधिवेशनय् २ करोड ८२ लख दां खर्च जूगु आर्थिक विवरण नं पेश याःगु खः ।
अथेहे बैठकं कृष्णप्रसाद सिटौलाया संयोजकत्वय् विधान संशोधन समिति, अर्जुननरसिंह केसीया संयोजकत्वय् न्हूगु विधान कथं नियमावली परिमार्जन यायेगु समिति व महेश आचार्यया संयोजकत्वय् महाधिवशेनय् वःगु न्हूगु नीति व ज्याझ्वः दुथ्याकाः अन्तिम रुप बीत नीति व ज्याझ्वः समिति गठन याःगु दु ।
