उच्चस्तरीय कार्यदलया बैठक निष्कर्ष बिहीन
न्हूगु संविधान निर्माणया झ्वलय् खनेदुगु विवाद ज्यंकेगु निंतिं गठन जूगु उच्चस्तरीय कार्यदलया बिहीवाः च्वंगु बैठक बिना निष्कर्ष क्वचाःगु दु ।
सिंहदरवार स्थित राज्य व्यवस्था समितिया भवनय् जूगु बैठकय् म्हिग व म्हीग कार्यदलया ग्वाहालि समितिया बैठकय् जूगु सहलहया बारे जानकारी याकूगु खः । बैठकय् थुगु कार्यदलं विवादीत ज्यंकेमफुसाः समस्या वइगु जूगुलिं थुगु हे समितिं समस्या ज्यंकेत दक्वं गम्भीर जुइमाःगु सहमति जूगु खः ।
बैठक लिपा कार्यदलया दुजः नापं नेपाली कांग्रेस संसदीय दलया नेता रामचन्द्र पौडेलं थौंया बैठकय् कार्यदलया ग्वाहालि समिति दुने जूगु सहलहया बारे खँल्हाबंला जूगु कनादिल । वय्कलं कन्हय् निसें गम्भीर जुयाः सहमति हे यायेगु कथं बैठक च्वनीगु नं कनादिल ।
कार्यदलया संयोजक नापं माओवादी नायः पुष्पकमल दाहाल 'प्रचण्ड' चीन भ्रमणं लिहांझायेधुंकाः च्वंगु कार्यदलया थ्व न्हापांगु बैठक खः । आः मेगू बैठकय् शुक्रवाः सुथसिया ८ बजे च्वनी ।
