एमाले बैठक कन्हय् तकया निंतिं स्थगित
थौं नं एमालेया धारणा मवः
सत्ता साझेदार नेकपा एमालें प्रधानसेनापति प्रकरणय् थःगु औपचारिक धारणा शनिवाः नं क्वछी मफुत । शनिवाः न्हिनय् पार्टी ज्याकू बल्खुइ च्वंगु स्थायी कमिटीया बैठक छुं नं निष्कर्षय् मथ्यंसीं कन्हय् सुथय् च्याताः ईलय् हाकनं च्वनीगु कथं स्थगित जूगु दु ।
कांग्रेस लगायत मेमेगु दलनाप परामर्श यायेमाःगु व पार्टी अध्यक्ष झलनाथ खनाल व वरिष्ठ नेता माधव नेपालया कार्य व्यस्थताया कारणं बैठक स्थगित याःगु खः ।
थौ च्वंगु बैठकय् अध्यक्ष झलनाथ खनाल पक्षधर नेतातय्सं प्रधानसेनापतियात कारवाही यायेमाःगु पक्ष न्ववाःगु दुसाः नेता ओली पक्षधरतय्सं धासाः स्पष्टिकरण बीधुंकूगुलिं कारवाही यायेम्वाःगु पक्ष न्ववाःगु खः ।
थ्वस्वयां न्ह्यः शुक्रवाः च्वंगु केन्द्रीय दुजःतय् अनऔपचारी बैठकय् अधिकांश दुजःतय्सं सेनापितं स्पष्टिकरण बीधुंकूगुलिं कारवाही न्ह्यने मयंकेत सुझाव ब्यूगु खः ।
पार्टी उपाध्यक्ष व गृहमन्त्री बामदेव गौतम लगायत छुं नेतात सेनापतिया कारवाही यायेमाःगु पक्ष दुसाः केपी ओलीया दुपिं गुलिखेंय् नेतात धासाः स्पष्टिकरण न्यनेगु ज्या हे गलत जूगु खँय् अडान कयाः च्वंगु दु । सरकारया नेतृत्व यानाच्वंगु नेकपा माओवादीं थ्व प्रकरण गुकथं न्ह्यने यंकेगु धाइगु खँय् एमालेया निर्णय पियाच्वंगु दु ।
