प्रधानसेनापति कारवाही योग्य : गृहमन्त्री
उपप्रधान एवं गृहमन्त्री बामदेव गौतमं सरकारया निर्देशन पटक पटक उल्लंघन याम्ह प्रधानसेनापति कारवाही योग्य जूगु खँ धयादीगु दु । स्पष्टिकरणया समर्थन यासें वयेकलं कारवाही नं यायेमाःगु खँ धयादीगु दु ।
प्रधानसेनापतिया खँ सहलह यायेत स्थायी समितिया बैठक च्वनेस्वयां न्ह्यः लोकतान्त्रिक अध्ययन केन्द्र नेपालं ग्वसाःग्वःगु भिंतुना कालबिल यायेगु ज्याझ्वलय् न्ववासें वयेकलं सैन्य भर्ती व सैनिक जनरलया म्याद थप मुद्दाय् सेनापितं सरकारया निर्देशन पालना मयागु खँ धयादीगु खः ।
'ठीक जुसां मजूसां पालना यायेमाः' गौतमं धयादिल, - 'आदेशया विकल्प मदु ।' तर अदालतया आदेशया भरय् प्रधानसेनापितं च्याम्ह सैनिक अधिकारीयात थःम्हस्यां पुननियुक्ति याःगु धासें आपत्ति प्वंकादीगु खः । 'अदालतं ला सरकारया नामय् धासाः आदेश ब्यूगु खः ।' वयेकलं धयादिल ।
प्रधानसेनापतिप्रति आक्रमक खनेदुम्ह गौतमं तत्कालिन प्रधानमन्त्री गिरिजाप्रसाद कोइरालं आःया थें हे परिस्थिति छम्ह अधिकारीया म्याद थप मयागुलिं जक कटवाल प्रधानसेनापति जुइ दुगु नं धयादिल । 'दक्वं खँ मने यायेगु खसाःलाः वयातहे श्रीपेच पुइकाब्यूसां जिल नि ।' मन्त्री गौतमं धयादिल ।
वहे ज्याझ्वलय् न्ववासें एमालेया मेम्ह नेता शंकर पोखरेलं नागरिक सर्वोच्चताया नांमय् न्ह्यनलाथें मयायेमज्यू धयादिल । अथेहे कांग्रेस केन्द्रीय दुजः मनमोहन भट्टराईं ताःफो दुने लानाच्वंगु आर्मीयात संकेमज्यू धयादिल ।
