विवादित बुँदाय् अझ मतभिन्नता
संविधानसभा खनेदुगु विवादित विषयत ज्यंकेगु निंतिं गठन याःगु उच्चस्तरीय कार्यदलया ग्वाहालि समितिया बुधवाः च्वंगु बैठकय् नं दलत दथुइ मतभिन्नता खनेदुगु दु ।
सिंहदरवारस्थित राज्य व्यवस्था समितिया भवनय् च्वंगु बैठकय् थीथी खुगू समितिया प्रतिवेदन बारे सहलह जूगु खः । बैठकय् राष्ट्र हित संरक्षण समिति, सांस्कृतिक सामाजिक ऐक्यबद्धता निर्माण आधार समिति, व्यवस्थापकिय अंगया निर्धारण समिति, न्यायप्रणाली सम्बन्धी समिति, मौलिक अधिकार व राज्यया निर्देशक सिद्धान्त समिति लगायत थीथी समितिया प्रतिवेदनय् सहलह जूगु खः ।
बैठकय् सरकारी ज्याखँया भाय् छु जुइगु नापं प्रान्तया भाय् बारे दलत दथुइ विवाद कायम हे जूगु दु । अथेहे न्हूगु संविधानय् अनिवार्य सैन्य तालिमया व्यवस्था तयेगु वा मतयेगु बारे नं दलत दथुइ विवाद कायम हे दु ।
थौया बैठकय् नं माओवादीं दक्वं नागरिकतय्त अनिवार्य सैनिक तालिम तयेगु व्यवस्था यायेमाःगु अडान काःगु खःसा माओवादी बाहेकया दलतय्सं सैन्य तालिम ब्यूसाः विश्वय् नेपाःया छवि स्यनीगु बिचाः प्वंकूगु खः ।
