रुपन्देहीलय् बम विष्फोट जुयाः प्यम्ह घाःपाः

बुधवाः सनिलय् रुपन्देहीया सिद्धार्थ राजमार्गया ड्राइभरटोलय् जूगु बम विष्फोटय् लानाः प्यम्ह घाःपाः जूगु दु । भैरहवां बुटवल पाखे वयाच्वंगु लु. १. ख. ६४९४ नम्बरया यात्रुबहाक मोइक्रोबसय् बम विष्फोट जूगु खः ।

बम विष्फोटय् लानाः मइक्रोबसय् सवार रुपन्देही पर्रोहाया शीव शर्मा, गजेडीया देउमाया भुजेल, बुटवलया सुशीला पौडेल व हेटौंडाया कुन्दा श्रेष्ठ घाःपाः जूगु दु । घाःपाः जूपिं मध्ये श्रेष्ठया अवस्था गम्भीर जूगु खँ धाःगु दु । घाःपाः जूपिं प्यम्हेसियां बुटवल स्थित लुम्बिनी अञ्चल अस्पतालय् वासः जुयाच्वंगु दु ।

घटनाया जिम्मा तराई जनतान्त्रिक मुक्ति मोर्चां काःगु दुसाः विष्फोट याःगु कारण बारे धाःसा सिकेमफुनी । विष्फोट लिपा प्रहरीं अनया सुरक्षा स्थित क्वाःतुगु दुसाः घटनाया बारे छानबिन यानाच्वंगु खँ प्रहरीं धाःगु दु ।