संविधान संशोधन यानाः नियमित खर्च हयेफइ : भट्टराई
एकीकृत नेकपा (माओवादी)या न्वकू डा. बाबुराम भट्टराईं अन्तरिम संविधान संशोधन यानाः नियमित खर्च हयेफइगु खँ धयादीगु दु । 'अन्तरिम संविधानया धारा ९६ संशोधन यानाः नियमित खर्च हयेफइ' भट्टराईं धयादिल, 'तर दकलय् बांलागु विकल्प न्हूगु सरकार दयेकाः बजेट हयेगु जुइ ।'
वय्कलं बजेट हयेगु हैसियत वर्तमान कामचलाउ सरकार नाप मदुगु नं स्पष्ट यानादिल । यदि सरकारं जबर्जस्ती याःसा थःपिं जनताया थाय् वनीगु धयादिल ।
मुस्ताङया निजी भ्रमण क्वचायेकाः बुधवाः सुथय् पोखार विमानस्थलय् पत्रकारत नाप खँल्हाबंला यानादिसें वय्कलं लाडकू कमाण्डरतय् चीन भ्रमण प्रति प्रधानमन्त्रीं उमित कारवाही यायेगु धकाः प्वंकूगु अभिव्यक्ति आपत्तिजनक जूगु धयादिल । वय्कलं बिदा कयाः वंपिं लडाकूत न्ह्याथाय् नं वनेदइगु धयादिल ।
अथेहे न्वकू भट्टराईं सहमतिया बाधक माओवादी मजूगु स्पष्ट यानादिसें दलत दथुइया सहमतिलय् हे न्हूगु सरकार गठन जुइमाःगु धयादिल ।
