नेपाः, भारत व चीन दथुइ सम्झदारी आवश्यक : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' नेपाः, भारत व चीन दथुइ रणनीतिक सम्झदारी आवश्यक जूगु खँ धयादीगु दु । वय्कलं नेपाःयात निकास बीत त्रिपक्षीय सम्झौता आवश्यक जूगु धयादीगु खः ।
चीनया भ्रमण क्वचायेकाः मंगलवाः बहनी येँय् थ्यंकादीम्ह प्रचण्डं त्रिभुवन विमानस्थलय् पत्रकारत नाप खँल्हाबंला यानादिसें तीव्र गतिलय् आर्थिक उन्नति यानाच्वंगु निगू जःलाः खःला देय्या दथुइ लाःगु नेपाःया निंतिं निगू देय्नाप सम्झदारी यानाः न्ह्याः वनेत आवश्यक जूगु धयादिल ।
वय्कलं बेइजिङय् थःम्हं चिनियाँ अधिकारीत नापलागु इलय् थुगु खँ तयाःगु व इमिसं थुकीयात सकारात्मक रुपं काःगु जानकारी बियादिल । चिनियाँ उच्च अधिकारीत याकनं हे भारत भ्रमणय् वनेत्यंगु व उगु इलय् चीनं भारतनाप थ्व विषलय् नं खँल्हाबंला याइगु प्रचण्डं कनादिल ।
अथेहे राजनीतिक दलत दथुइ सहमति यानाः न्हूगु सरकार गठन यायेमाःगु धयादिसें नायः प्रचण्डं तर अज्याःगु सरकारया नेतृत्व माओवादीं याःसा उत्तम जुइगु धयादिल ।
चीन भ्रमणया झ्वलय् प्रचण्डं चिनियाँ उच्च अधिकारीत नाप खँल्हाबंला यानादीगु खःसा सांघाईलय् जुयाच्वंगु वर्ल्ड एक्स्पोया नं अवलोकन यानादीगु खः ।
