सेनापतिया विवादबारे सहमति मालेगु माओवादीया निर्णय
सत्तारुढ माओवादीं सरकारया निर्णय लितकाये मज्यूगु ठहर याःगु दु । शनिवाः च्वंगु माओवादी सचिवालयया बैठकं सरकारं याःगु निर्णय सही जुसां नं दलत दथुइ सहमतिया आवश्यकता माःगु ठहर याःगु दु ।
शनिवाः प्रधानमन्त्री निवास बालुवाटरय् च्वंगु बैठकं सरकारं ब्यूगु आदेश प्रधानसेनापितं पालना मयायेवं खनेदुगु विवाद सहमतिइ क्वचायेकेगु निष्कर्ष पिकागु खः । बैठकय् जूगु जानकारी बियादिसें माओवादीया प्रवक्त दिनानाथ शर्मां जटिल विषय जूगुिलं थुकीयात सरकारं मेमेगू दलतनाप सहमति यानाः क्वचायेकेमाःगु धयादिल ।
बैठकय् सेनापति स्पष्टिकरणया विषययात कयाः प्यखेलं विरोध जुइवं सहमतिइ क्वचायेकेगु निर्णय याःगु खँ प्रवक्त शर्मा धयाादिल । थ्वस्वयां न्ह्यः छुं न्हि च्वंगु सचिवालयया बैठकं धासाः सेनापतिया विवाद तत्काल कारवाही यायेत सरकारयात इनाप याःगु खः ।
बैठकय् भारत अमेरिका नापं नेपाःया राजनीतिक दलतय्सं तकं सरकारया तच्वयेक आलोचना यायेवं माओवादीं दक्वं दलया सहमतिइ थ्व विषययात क्वचायेकेगु निर्णय याःगु खः ।
स्वघौ तक च्वंगु बैठकय् छुं दुजःतय्सं सरकारं याःगु निर्णय पाखें ल्यूने वनेमज्यूगु सुझाव ब्यूगु खः । बैठकय् सरकारया निर्णय सहलह यानाः जक क्वचायेकेत सुझाव ब्यूगु खसां निर्णय लितः काये मज्यूगु बीचाः दुजःतय्सं प्वंकूगु खः ।
