'माओवादीया सत्तामोहया कारणं मुलुकय् संकट'
येँ (सन्ध्या टाइम्स)/सरकारय् दुथ्याःगु तराई मधेश लोकतान्त्रिक पार्टीया अध्यक्ष महन्थ ठाकुरं माओवादीया सत्तामोहया कारणं हे मुलुकय् गम्भीर कथंया संकट ब्वलनाच्वंगु खः धकाः द्वपं बियादीगु दु ।
सप्तरीया पार्टी ज्याकुथी थौं सुथय् पत्रकार सम्मेलन यासें वय्कलं थ्व द्वपं बियादीगु खः। अध्यक्ष ठाकुरं माओवादी थःगु लडाकुयात समायोजन मयासे सत्ता कब्जा यायेगुपाखे न्ह्याः वनाच्वंगुलिं हे गतिरोध जुयाच्वंगु खः धयादिल। वय्कलं धयादिल, 'क्रान्तिकारी पार्टीतय्सं हे जुजु हयेत्यंगु दु, उज्वःगु अवस्था वल धाःसा गणतन्त्र गुमे जुइ नापं जनआन्दोलन व मधेशया आन्दोलन नं गुमे जुइगु अवस्था वयेफु, उकिं मधेशवादीत छप्पँ जुयाः सचेत जुयाच्वनेमाःगु अवस्था दु ।'
