मतदाता नामावली विरुद्ध लिम्बुवान बन्द
येँ (सन्ध्या टाइम्स)/निर्वाचन आयोगं संचालन यानाच्वंगु किपा सहितया राष्ट्रिय म्हसीका पौ नापं मतदाता संकलन अभियान तत्काल बन्द यायेत माग यासें संघीय लिम्बुवान राज्य परिषदं थौं पूर्वी नेपाःया गुंगू जिल्लाय् आमहड्ताल आह्वान याःगु दु ।
अरुण पूर्वया गुंगू जिल्लायात लिम्बुवान राज्य घोषणा मयासे दथुइ वयाः मतदाता पौ दयेकेगु ज्या यात धासें परिषदं उकिया विरोधय् थ्व आमहड्तालया आह्वान याःगु खः ।
नेपाः संघीय राज्य जुइधुंकूगु अवस्थाय् संघीय राज्यतपाखें हे मतदाता पौ दयेकेगु ज्या यायेमाःगु थासय् निर्वाचन आयोगं याःगु पायछि मजूगु जिकिर परिषदं याःगु दु।
थौंया बन्दयात कयाः परिषद्या वरिष्ठ न्वकु ज्ञान बहादुर गुरुङं पिथंगु विज्ञप्तिइ आकस्मिक सेवाया गाडी, विदेशी कुटनीतिक नियोग, दमकल, एम्बुलेन्स, शववाहन, दुरुया ट्याङकर व जन्तीया गाडी धाःसा चले जुइ धयातःगु दु।
बन्द आह्वान यानातःगुलिं पूर्वी नेपाःया मोरङ, सुनसरी, धनकुटा, तेह्रथुम, शंखुवासभा, पांचथर, ताप्लेजुङ, इलाम, झापा जिल्लाया यातायात, बजाः, कलकारखाना व शिक्षण संस्था बन्द पूर्ण रुपं बन्द जुयाः अनया जन जीवन तकं प्रभावित जूगु दु ।
बन्द आह्वान यानातःगुलिं कोशी राजमार्गया धरान- धनकुटा लागाय् सुथंनिसें हे सवारी साधन ठप्प जूगु दु। थ्व गुंगुलिं जिल्लाय् शिक्षण संस्था नं बन्द जूगुलिं द्वलंद्वःम्ह विद्यार्थीतय्सं थौं आखः नं ब्वने मखन।
परिषदं थौं छन्हु बन्द यानाः नं उगु ज्या मदिकल धाःसा हाकनं मेगु सशक्त आन्दोलन यायेगु जुइ धकाः ख्याच्वः बिउगु दु ।
