राष्ट्रपति वन, प्रचण्ड वइगु
येँ (सन्ध्या टाइम्स)/राष्ट्रपति डा. रामवरण यादव थौं चीनपाखे झाःगु दुसा चीनय् वनाच्वंम्ह एकीकृत माओवादीया अध्यक्ष प्रचण्ड थौं हे लिहां झाइगु जूगु दु। साङ्घाइ एक्स्पो समापन समारोहय् ब्वति कायेत थौं राष्ट्रपति उखे झाःगु खः। वय्कलं छवाः तक चीन भ्रमण यानादी ।
झिंन्हय्म्हेसिया पुचःया नेतृत्व यासें राष्ट्रपति यादव उखे झाःगु खःसा उगु पुचलय् पर्यटनमन्त्री शरतसिंह भण्डारी, नेपाःया नितिं चीनया राजदूत टंक कार्की, राष्ट्रपति कार्यालयया सचिव वामप्रसाद न्यौपाने, राष्ट्रपतिया म्ह्याय् अनिता नं दुथ्याः। उखे उगु हे एक्स्पो अवलोकन यानाः चीन भ्रमण यानादीम्ह माओवादीया अध्यक्ष प्रचण्ड धाःसा थौं चान्हय् येँय् लिहां झाइगु जूगु दु। वंगु कार्तिक ५ गते चीन भ्रमणय् झाःम्ह प्रचण्डं अन चिनिया सरकारया अधिकारश्र नापं चिनियाँ कम्युनिष्ट पार्टीया थीथी नेतातय्त नापलानाः सहलह ब्याकादीगु खः ।
