१३क्वःगु खुसीइ नं प्रधानमन्त्री ल्ययेत असफल

न्हूम्ह प्रधानमन्त्री ल्ययेगु निंतिं व्यवस्थापिका संसदय् मंगलवाः जूगु १३क्वःगु चरणया निर्वाचनं नं प्रधानमन्त्री ल्ययेत ताः मलाःगु दु ।

प्रमुख प्रतिपक्षी एनेकपा (माओवादीं) प्रधानमन्त्रीया निर्वाचन पाखें उम्मेदवारी लितकायेधुंकाः ल्यं दीम्ह छम्ह जक उम्मेदवार रामचन्द्र पौडेल थौं नं बूगु खः । माओवादी व एमालें ब्वति मकाःगु निर्वाचनय् कांग्रेस संसदीय दलया नेता रामचन्द्र पौडेलया पक्षय् ९८, विपक्षय् २ व तटस्थय् ४४ मत लाःगु खः ।

१३क्वःगु पराजय लिपा पौडेलं स्वंगू दलत दथुइ जूगु ३बुँदा मध्ये माओवादीं न्हापांगु बुँदा पालना याःसा थःम्हं उम्मेदवारी लितकायेगु धयादिल । वय्कलं शान्ति व संविधानया विषयलय् नं दलत दथुइ सहमति जुइमाःगु धयादिल ।

थौं नं संसदं न्हूम्ह प्रधानमन्त्री ल्ययेमफेवं आः मेगू चरणया निर्वाचन कात्तिक १४ गते जुइ ।