राष्ट्रपति यादव चीन प्रस्थान
राष्ट्रपति डा. रामवरण यादव संघाईलय् जुयाच्वंगु वर्ल्ड सांघाई एक्स्पो २०१०या समापन समारोहलय् ब्वति कायेत मंगलवाः चीन प्रस्थान यानादीगु दु ।
मंगलवाः सुथय् छवाःयंकया चीनया मैत्रीपूर्ण सदभावना भ्रमणय् झायेगु इलय् राष्ट्रपति यादवयात मन्त्री, उच्चपदस्थ कर्मचारी, विदेशी कुनीटिज्ञ लगायत त्रिभुवन विमानस्थल थ्यंकाः विदाइ याःगु खः । राष्ट्रपति यादव नापं वय्कया म्ह्याय् अनिता यादव, पर्यटन मन्त्री शरदसिंह भण्डारी, राष्ट्रपतिया सल्लाहकार सूर्य ढुंगेल व हरि शर्मा, चीनया निंतिं नेपाःया राजदूत टंक कार्की, राष्ट्रपति ज्याकूया सचिव वामन न्यौपाने, परराष्ट्र सचिव मदन भट्टराई व शिष्टाचार महापाल मुक्ति भट्ट नं चीन प्रस्थान याःगु दु ।
कात्तिक १४ गते क्वचाइगु सांघाई एक्स्पोलय् ब्वति कयाः उगु हे न्हि कुन्हु राष्ट्रपति यादवं चिनियाँ प्रधानमन्त्री वेन जिया बाउ नापलानादीगु ज्याझ्वः दु । चीन भ्रमणय् वय्कलं साघांईया सरकारी पदाधिकारीत व अन च्वंपिं नेपाली विद्यार्थीत नाप नं खँल्हाबंला यानादीगु ज्याझ्वः दु ।
चीन भ्रमणया झ्वलय् राष्ट्रपति यादवं चीनया स्वाशासित क्षेत्र तिब्बत, औद्यौगिक शहर क्वाङचाउ व सियान शहर नं वनीगु ज्याझ्वः दु ।
