सहमति यानाः जक बजेट हयादिसं : नेम्वाङ
सभामुख सुभाषचन्द्र नेम्वाङं राजनीतिक दलत दथुइ सहमति यानाः जक बजेट हयेत प्रधानमन्त्री माधवकुमार नेपालयात सुझाव बियादीगु दु ।
सरकारं कात्तिक १५ गते बजेट पेश यायेगु धकाः तःगु प्रस्तावयात सभामुख नेम्वाङं अस्वीकार यायेधुंकाः मंगलवाः सुथय् वय्कलं प्रधानमन्त्री नाप बजेटया बारे सहलह यानादीगु खः । उगु इलय् नेम्वाङं बजेटया बारे सत्तारुढ दलत व प्रमुख प्रतिपक्षी माओवादी नाप सहलह यानाः उमिगु सहमतिलय् जक हयेमाःगु सुझाव बियादीगु खः ।
प्रधानमन्त्री निवास बालुवाटारय् जूगु खँल्हाबंलाय् सभामुख नेम्वाङं बजेट बिहीनताया अवस्थाय् देय् आर्थिक संकटय् लानाच्वंगुलिं सरकार प्रमुखया हैसियतं थुकीया समाधान मालेत प्रधानमन्त्रीयात इनाप यानादीगु खः । लिसःलय् प्रधानमन्त्री नेपालं माओवादी अध्यक्ष पुष्पकमल दाहाल 'प्रचण्ड' कन्हय् चीनं लिहांवयेवं विस्तृत रुपं सहलह यायेगु धयादीगु खः ।
अथेहे प्रधानमन्त्री व सभामुख नेम्वाङ दथुइ राजनीतिक गतिरोध, संविधान निर्माण नापं प्रधानमन्त्रीया निर्वाचनया बारे नं खँल्हाबंला जूगु खः ।
