हानं छक्वः विदेशी हस्तक्षेप

नेपाःया आन्तरिक मामिलाय् हानं छक्वः विदेशी दवाव हावी जुया वःगु दु । प्रधानसेनापति रुक्मांगद कटवालयात चीकेगु सवालय् पिहां वःगु विवादया झ्वलय् विदेशी शक्तितय्सं सरकारयात तःधंगु दवाव बियाः अन्ततः सेनापतियात चीके हे म्वाःगु अवस्था पिकया बिउगु दु । थुकी जःलाखःला देय् भारतपाखें ला स्वयम विदेशमन्त्रीं हे नेपाःया नेतातय्त तप्यंक फोन यानाः सेनापति चीके मते धकाः 'निर्देशन' समेत बियाहःगु नं समाचार पिहां वःगु दु । यदि सेनापति चीकल धाःसा बांमलाइगु ख्याच्वः बियाः उमिसं नेपाःया आन्तरिक मामिलाय् नांगां हस्तक्षेप याःगु दु ।

सेनापति नेपाली सेनाया खः । उकिं वयात चीकेगु वा मचीकेगु धकाः निर्णय यायेगु अधिकार नं नेपाली जनतायाके दु । उकी बिचाःया भिन्नताया कारणं विवाद जुइगु स्वाभाविक खः तर उकिया लबः कयाः विदेशीतय्सं थःगु निर्णय लादे याकेत स्वयेगु धाःसा असंलग्न नीतियात ल्वःगु ज्या मखु । सेना अतिकं संवेदनशील अंग खः । अज्याःगु अंग बारे निर्णय यायेत तकं नेपालं विदेशीया निर्देशन कायेमाःगु खःसा नेपाःया राष्ट्रियता स्वतन्त्र अस्तित्व व सार्वभौमिकताया बारे यानाच्वंगु वकालत बेकार जुइ । थौं प्रधानसेनापतियात चीके हे माः धकाः सनाच्वंपिं पार्टीतय्सं ला अज्याःगु विदेशी निर्देशनया आलोचना याइगु स्वाभाविक हे खः । नापनापं सेनापति चीके मजिउ धाईपं राजनीतिक पार्टीतय्सं नं चीके मजिउ धइगु थःगु बिचाःयात यथावत यानाः उकी जुयाच्वंगु विदेशी हस्तक्षेपयात धाःसा विरोध याये हे माः । थुकिं हे जक दलतय्सं देय्या राष्ट्रियताया सवालय् ल्ह्वनाच्वंगु सः थासय् लाये फइ ।

More Stories Like this