लडाकूतय् चीन भ्रमण बारे अनमिननाप लिसः फ्वनः
'कमाण्डरतय् चीन भ्रमण व्यक्तिगत'
एकीकृत नेकपा (माओवादी)या लडाकूया कमाण्डरतय् चीन भ्रमण बारे सरकारं नेपाः स्थित संयुक्त राष्ट्रसंघीय मिसन अनमिननाप लिसः फ्वंगु दु ।
शान्ति मन्त्रालयं सोमवाः अनमिनयात छपु पौ च्वयाः लडाकू समायोजन विशेष समितिया मातहत मवनीगु लडाकूया कमाण्डरतय् चीन भ्रमणया बारे स्पष्ट यायेत माग याःगु दु । नापं सरकारं विशेष समितिया मातहत मवगु इलय् लडाकू कमाण्डरत विदेश भ्रमणय् वंगु गौरकानुनी जूगु नं ठहर याःगु दु ।
उखे सोमवाः रिपोटर्स क्लबं याःगु साक्षात्कार ज्याझ्वलय् माओवादी न्वकू नारायणकाजी श्रेष्ठ 'प्रकाशं' लडाकूया कमाण्डरतय् चीन भ्रमण व्यक्तिगत जूगु धयादिसें चिनियाँ कम्युनिष्ट पार्टीया जनमुक्ति सेनाया ब्वनाय् कमाण्डरत चीन मवंगु दावी यानादिल ।
सोमवाः हे जनसम्पर्क मञ्चं याःगु साक्षात्कार ज्याझ्वलय् माओवादी जनसेनाया इञ्चार्ज वर्षमान पुन 'अनन्तं' नं कमाण्डरतय् भ्रमण व्यक्तिगत जूगु धयादिसें अनमिननाप बिदा स्वीकृति यानाः चीन वनाःगु धयादिल । वय्कलं नेपाली सेना थें लडाकूत नाप नं बिदाया इलय् न्ह्याथाय् नं वनेगु स्वतन्त्रता दुगु धयादिल ।
वय्कलं प्रधानमन्त्री माधवकुमार नेपालं चीन भ्रमणय् वंपिं कमाण्डरतय्त कारवाही यायेगु धकाः बियादीगु ख्याच्वःयात गैर जिम्मेवारीया संज्ञा नं बियादिल ।
