'देय्या परिस्थितियात ध्यानय् तयाः याकनं लिहांवयाः'
सभामुख सुभाषचन्द्र नेम्वाङ क्यानाडा भ्रमण क्वचायेकाः सोमवाः नेपाः लिहांझायादीगु दु । नेम्वाङ क्यानाडा सरकार व क्यानाडेली बार एसोसियसनया ब्वनाय् च्यान्हु न्ह्यः क्यानाडा प्रस्थान यानादीगु खः । त्रिभुवन अन्तराष्ट्रिय विमानस्थलय् पत्रकारत नाप खँल्हाबंला यानादिसें वय्कलं देय्या राजनीतिक परिस्थितियात ध्यानय् तयाः याकनं लिहांवयाःगु प्रतिक्रिया बियादिल । वय्कः निर्धारित ई स्वयां स्वन्हु न्ह्यः येँय् थ्यंकादीगु खः ।
वय्कलं प्रधानमन्त्रीया निंतिं जुयाच्वंगु अर्थहीन निर्वाचानया श्रृंखला क्वचायेकेगु निंतिं दलत नप तत्काल खँल्हाबंला न्ह्याकीगु धयादिल । नापं वय्कलं थुकीया निकास पिकायेत अन्तरिम संविधानयात संशोधन यानाः जुसां निकास पिकायेमाःगु धयादिल ।
व्यवस्थापिका संसदया महासचिव मोहनप्रसाद भट्टारई नाप सोमवाः येँय् थ्यंकादीम्ह नेम्वाङं क्यानाडाय् संघीय देशय् केन्द्र व राज्यया अन्तसम्बन्ध, विवाद ज्यंकेगु प्रकृया, संघीय राज्यय् न्यायपालिका नापं भाय्या बारे अध्ययन यानादीगु खः ।
सभामुख नेम्वाङ नापं वंगु सभासदतय् पुचः धाःसा बिहीवाः जक येँय् लिहावइगु ज्याझ्वः दु ।
