हाँडीगाँया जात्रा क्वचाल
गनं मदुगु जात्रा हाँडीगामय् धैगु उखानं नांजाःगु हाँडीगाँया चोकदे नाराद्यःया जात्रा थौं क्वचाल ।
जात्राय् ब्रम्हा बिष्णु व महेश्वर याना स्वंगू खःया जात्रा याःगु खः । कतिपून्हिया दिं स्थानिय साय्मितय्सं खः दयेका मैनया स्वांमां खः झःझः धायेकेगु ज्या जुइ । जात्राया दिं थौं सुथय् आचाजुपाखें न्हापालक ठटुटोलया नारायण दःया पूजा यायेधुंकाः मेगू निगू खःया नं पूजा जुइ । पूजा क्वचायेवं पयँता खलःया पोंगा बाजं थानाः खः जात्रा न्ह्याकूगु खः ।
थुगु जात्राय् दयेकूगु खतय् गजू क्वय् लाकातःगु दइसा च्वये द्यः तयातःगु दइ । खः दयेकेबले तुयूगु कापतं खःयात हिनाः हिमालयया रुप बिइ । क्वय् जंगलया रुप बिइत धुनी व सयपत्री स्वांया सिमाकचा हे तइ । खः जात्रा यायेबले निम्हेसिनं खः चाःहिकीसा छम्ह नाइकें हःपा बिइ । जात्राया निंतिं स्वंगुलिं खः कोटालटोलय् थ्यंकेहयेवं भुवःलाक खः जात्रा जुइ ।
थुगु जात्राय् मैनया स्वाँ दयेका छाय्पीइमाःगु खःया गजू क्वय् लाकेमाःगु व द्यः च्वये तयेमाःगु हुनिं थनया जात्रायात 'कहिँ नभएको जात्रा हाँडी गाउँमा' धायेगु चलन न्ह्याःगु खः ।
