थेच्वय् नीप्यसःयात छक्वलं झ्वःछुकाः भ्वय्

यल (सन्ध्या टाइम्स)/थेच्वय् झिंनिदँय् छकः पिका इगु जात्राया झ्वलय् म्हिगः देय् भ्वय् नयेत अन निखा छेँया कम्पाउण्डय् दनातःगु पःखाः व चःबि नापं थुनाछ्वत ।

उगु जात्राय् म्हिगः अर्थात कातिपुन्हि कुन्हु थेच्वया भुतू प्वालं छम्ह अले सुनागूया गुथियारतय्त झ्वःछुकाः भ्वय् नकेमाःगु खः। उगु भ्वय्यात देय्भ्वय् धाइ। थेच्वया जक झिंच्यासःम्ह नापं सुनागूया खुसःम्ह यानाः थ्यंमथ्यं नीप्यसःम्हेसित थ्व भ्वये नकेमाः। थेच्वया दरिख्यः धइगु थासं तप्यंक झ्वःछुनाः थेच्वमितय्त द्यः जुयाः प्याखं ल्हुइपिं मनूतय्सं भ्वय् नकूगु खःसा मेगु थासय् तयाः सुनागूयापिंत भ्वय् नकूगु खः। म्हिगः भ्वय् नकेत तप्यंक हे झ्वःछुइ माःगुलिं अथे पःखाः व चःबि नापं थुनेमाःगु खः। म्हिगः देय्भ्वय् नकेत न्याम्ह म्येय् क्वःथःगु खःसा प्यंगू ट्याक्टर बजि हःगु खः। भ्वजय् म्येय्या ला, बाहांया ला, हाकुमुस्या, पालु, हि आदि घासाता तयेमाः ।

उगु भ्वय्या निंतिं थ्यंमथ्यं २२ लाख तका खर्च जूगु खँ धाःगु दु। थेच्वय् थुगुसी न्ह्यानाच्वंगु जात्राया निंतिं सछि व न्यय्छम्ह स्वयंसेवक परिचालन यानातःगु दु। देय् भ्वय् नःगु बापत वइगु पुस लाय् छेँखापतिकं न्हय्फा वा बीमाःगु चलन दु। थेच्वया उगु प्याखं जात्राया विशेषता धइगु स्वेत भैरव पिहां वइगु खः ।