सामुदायिक स्वास्थ्यया नितँजाः
येँ (सन्ध्या टाइम्स) /थनया १५ वडा डल्लु आवास दुने च्वंगु सामुदायिक स्वास्थ्य सेवा परिषद्या ग्वसालय् वंगु मोहनिया भिंतुना कालबिल यायेगु लिसें संस्थायात ग्वाहालि यानाच्वंपिंत सुभाय् पौ व हनापौ लःल्हायेगु ज्याझ्वः जुल ।
परिषद्या अध्यक्ष रत्ननारायण न्हूजवाः साय्मिया सभापतित्वय् न्ह्याःगु उगु ज्याझ्वलय् परिषद्या नितँज्या ल्ह्वनेगु ज्याया नं शुभारम्भ जूगु खः। ज्याझ्वय् मू पाहां सभासद् नविन्द्रराज जोशीं थीथी व्यक्तियात सुभाय्पौ व हनापौ लःल्हानादिल। थुकिया लिसें ज्याझ्वलय् गुरुजुपिंपाखें मंगलाचरण पाठ यानाः व दाफा बाजं थानाः परिषद्या नितँज्याः ल्ह्वनेगु ज्याया शुभारम्भ यानादीगु खः ।
उगु हे ज्याझ्वलय् मय्जु नानी छोरी महर्जनपाखें भवन निर्माणया निंतिं ५०,५०५/५० तका मू पाहांयात लःल्हानादीगु खः। अथे हे नाती मैँया मानन्धरं नं ५०,१०५ तका, रामेश्वर मानन्धर व दुर्गा मानन्धरं नं २५,५०५ तका लःल्हानादीगु खः। उगु ज्याझ्वलय् डा. सुमित्रा मानन्धर गुरुङं ५५,०००, जीवन के.सीं २५,५०० तका आर्थिक ग्वाहालि यायेगु बचं बियादीगु खः ।
परिषद्या अध्यक्षं पुनर्गठित सल्लाहकार व न्हूपिं साधारण दुजःपिंत खादा क्वखायेकाः लसकुस यानादीगु खः। अथे हे ज्याझ्वलय् परिषद्या उपाध्यक्ष हरिगोपाल श्रेष्ठं लसकुस यानादीगु खःसा सचिव मेजर भिमबहादुर गुरुङं सुभाय् बियादीगु खः। ज्याझ्वलय् परिषद्या सहप्रमुख सल्लाहकार इश्वरमान डंगोल, निर्माण तथा योजना संयोजक इ. मिलन शाक्य, आर्थिक संकलनया संयोजक श्रीराम श्रेष्ठपिंसं नितँज्याः निर्माणया बारे ध्वाथुइकादीगु खः ।
