शिविर खाली याये मखु: रायमाझी
येँ (सन्ध्या टाइम्स)/माओवादीं शिविर खाली मयाःतले प्रधानमन्त्री पदया उम्मेदवार रामचन्द्र पौडेलं थःगु उम्मेदवारी लित काये मखु धकाः शर्त न्ह्यःने तयाच्वंगु इलय् उखे माओवादी स्थायी समितिया दुजः तोपबहादुर रायमाझीं संसदवादी दलत शान्ति व संविधानप्रति प्रतिवद्ध मजूतले शिविरं माओवादी लडाकु खाली यायेगु जुइ मखु धकाः मेगु शर्त न्ह्यःने तःगु दु ।
एनेकपा (माओवादी) पाखें अर्घाखाँचीया मसुरपाटा धाःगु थासय् याःगु छगू ज्याझ्वलय् न्ववासें वय्कलं थ्व न्हूगु शर्त न्ह्यःने तयादीगु खः ।
लिसें वय्कलं माओवादीया नेतृत्वय् न्हूगु सरकार गठन मयात धाःसा देशय् तःधंगु दुर्घटना जुइ धासें आः हे देशय् प्रतिगामीतय्सं छ्यं ल्ह्वना हयाच्वंगु खँ नं कनादिल ।
