कमाण्डरतय्त कारवाही यायेगु प्रमया ख्याच्वः
प्रधानमन्त्री माधवकुमार नेपालं छुं दिं न्ह्यः चीन भ्रमणं लिहावःपिं माओवादी लडाकूया कमाण्डरतय्त कारवाही यायेगु ख्याच्वः बियादीगु दु ।
थःगु गृहजिल्ला रौतहट वने न्ह्यः आइतवाः सिमरा विमानस्थलय् पत्रकारत नाप खँल्हाबंला यानादिसें प्रधानमन्त्री नेपालं विशेष समिति मातहत वयेधुंकूगु लडाकूतय्सं सरकारयात छुं नं खबर मयासें चीन भ्रमणय् वंगु धयादिल ।
विशेष समिति अर्न्तगत वयेधुंकूगुलिं विदेश भ्रमण याये न्ह्यः उकीया खबर सरकारयात बीमाःगु खःसां अथे मयाःगु धयादिसें वय्कलं कमाण्डरतय् चीन भ्रमण प्रति आपत्ति प्वंकादिल । तर वय्कलं लडाकूतय् कमाण्डरयात छु कथंया कारवाही यायेगु धइगु प्रष्ट यानामदी ।
थ्वस्वयां न्ह्यः शनिवाः शान्ति मन्त्री रकम चेम्जोङं नं लडाकूया कमाण्डरतय् चीन भ्रमणय् आपत्ति प्वंकादिसें उकीया बारे नेपाः स्थित राष्ट्रसंघीय मिसन अनमिननाप स्पष्टिकरण कायेगु खँ धयादीगु खः ।
छुं दिं न्ह्यः माओवादी सैन्य इन्चार्ज वर्षमान पुन 'अनन्त', डेपुटी कमान्डरत जनार्दन शर्मा 'प्रभाकर' व चन्द्रप्रकाश खनाल 'बलदेव' नापं कमाण्डरत कमान्डर यामबहादुर अधिकारी, सुकबहादुर रोका, तेजबहादुर ओली, महेन्द्रबहादुर शाही १०न्हुन्यंकया चीन भ्रमण यानाः लिहांवःगु खः ।
