एमालेया आधिकारिक धारणा थौं
प्रधानसेनापति प्रकरण बारे एमाले दुने ब्वलंगु कचवंयात कयाः सहलह यायेत थौं एमाले केन्द्रीय समिति व स्थायी समितिया बैठक च्वनेत्यंगु दु । बैठक लिपा सेनापति प्रकरण बारे एमालें आधिकारिक धापू पित बी ।
बैठकय् सरकारं प्रधान सेनापतियाके काःगु स्पष्टी- करणयात समर्थन याःसां सेनापतियात अवकास हे बीगु ज्यायात धाःसा समर्थन मयाइगु खँ एमालेया छम्ह केन्द्रीय दुजलं धाःगु दु । 'एमालेया थ्व नीति मध्यमार्गी जुयाः पिहां वइ' वय्कलं धयादिल ।
एमालेया केन्द्रीय बैठक १२ बजे च्वनीगु ग्वसाः दुसा स्थायी समितिया बैठक ४ बजे च्वनेत्यंगु दु । केन्द्रीय समितिया बैठकय् ब्वति कायेत येँय् दुपि फुक्कं दुजःतय्त निर्देशन छ्वये धुंकूगु दु ।
थ्वहे झ्वलय् प्रधानसेनापति प्रकरण बारे सहलह यायेत प्रधानमन्त्री पुष्पकमल दाहाल 'प्रचण्डं' थौं एमाले अध्यक्ष झलनाथ खनाल व मधेशी जनअधिकार फोरममा अध्यक्ष उपेन्द्र यादवयात नाप लायेत्यंगु दु । थ्व बारे सहलह यायेत माओवादी केन्द्रीय सचिवालयया बैठक थौं नं च्वंगु दु ।
थ्वहे झ्वलय् नेकांया सुजाता कोइरालां प्रधानसेनापतियात अवकास हे बीमाःगु बिचाः प्वंकादीगु दु ।
