विवाद झन तच्वल : यादव
मधेशी जनअधिकार फोरमया नायः उपेन्द्र यादवं संविधानसभा दुनेया विवादित विषयलय् सहमति यायेगु निंतिं गठन जूगु उच्चस्तरीय कार्यदल लिपा झन विवाद अप्वःगु खँ धयादीगु दु ।
रिपोटर्स क्लबं शनिवाः येँय् याःगु छगू साक्षात्कार ज्याझ्वलय् यादवं कार्यदलया बैठक च्वनेधुंकाः दलतय्सं थःथःगु पक्षय् अडान जक कायेगु यानाहःगुलिं दलत दथुइया विवाद झन् झन् अप्व जुयावःगु धयादिल । वय्कलं बैठकय् थःथःगु अडान जक तइगु कार्यदलया औचित्य मदुगु नं धयादिल ।
दलत दथुइ दुगु अविश्वासया कारणं वर्तमान समस्या जुयाच्वंगु धयादिसें यादवं दलतय्सं पुलांगु सम्झौता कार्यन्वयन यानाः विश्वासया वातावरण सृजना यायेमाःगु धयादिल । वय्कलं विश्वासया वातावरण निर्माण मजुइकं प्रधानमन्त्री नं ल्ययेमफइगु दावी यानादिल ।
मेगू छगू प्रशंगय् वय्कलं माओवादी नायः पुष्पकलम दाहाल 'प्रचण्ड'या चीन भ्रमण प्रति शंका प्वंकादिसें देशय् राजनीतिक संकट जुयाच्वंगु इलय् विदेश भ्रमणय् वनेगु उचित मजूगु धयादिल । वय्कलं माओवादी लडाकुतय् चीन भ्रमण बारे विशेष समितिं स्पष्ट यायेमाःगु धयादिल ।
