लडाकूया कमाण्डरतय् चीन भ्रमणया बारे स्पष्टिकरण काइगु
नेपाः स्थित राष्ट्रसंघीय मिसन अनमिनया निगरानीलय् दुगु माओवादी लडाकूया कमाण्डरत चीन भ्रमणय् वंगु बारे सरकारं स्पष्टिकरण काइगु जूगु दु । शान्ति मन्त्री रकम चेम्जोङं माओवादी लडाकुतय् चीन भ्रमणया बारे थ:म्हं बुखँ ब्वनाः जक स्यूगु धयादिसें उकीया बारे अनमिन नाप स्पष्टिकरण कायेगु धयादिल ।
येँय् शनिवाः जूगु छगू साक्षात्कार ज्याझ्वलय् वय्कलं लडाकुत विशेष समितिया मातह्त हयेगु सहमति जुसां व्यवहारीक रुपं मवनीगु स्पष्ट यानादिसें कमाण्डरतय् भ्रमणया बारे विशेष समितियात छुं नं खबर मदुगु धयादिल । नेपाली कांग्रेसया नेता डा. रामशरण महतं नं थुकीया बारे छानबिन जुइमाःगु माग यानादिल ।
उखे माओवादी सचिव सीपि गजुरेलं धाःसा माओवादी लडाकुत विशेष समितिया मातहत वयेधुंकूगुलिं थुकीया बारे पार्टीं छुं नं मस्यूगु धयादिसें थुकीया लिसः विशेष समितिनाप हे कायेमाःगु धयादिल ।
