'सहमति आवश्यक जुइधुंकल'
राजनीतिक गतिरोध यथावत कायम जुयाच्वंगु इलय् प्रमुख दलया शीर्ष नेतातय्सं राजनीतिक गतिरोध चीकेगु निंतिं सहमति आवश्यक जुइधुंकूगु खँ धाःगु दु । नेकपा एमालें मोहनी, स्वन्ति व छठ पर्वया लसतालय् भिंतुना कालविल यायेगु निंतिं थौं पार्टी मुख्यालय बल्खुइ याःगु तुच्चा ज्याझ्वःलय् माओवादी, कांग्रेस व एमालेया नेतातय्सं सहमतिया यायेमाःगु खँय् बः ब्यूगु खः ।
तुच्चाय् प्रधानमन्त्री नापं एमाले वरिष्ठ नेता माधवकुमार नेपालं दलत इमान्दार जुसाः सहमित यायेत थाकु मजूगु धयादिल । वय्कलं माओवादीं सम्झौता पालना याःगु थःपिंसं स्वये चाहे जूगु धयादिल ।
कांग्रेस सभापति सुशील कोइरालां सहमति अत्यावश्यक जूगु धयादिसें सहमतिया बाधक धाःसा माओवादी व एमाले जूगु द्वपं बियादिल । उखे एमाले नायः झलनाथ खनालं धाःसा एमाले सहमितया बाधक मजूगु टिप्पणी यानादिसें दलतय्सं 'गिभ एण्ड टेक'या मान्यता कथं सहमति यायेमाःगु धयादिल ।
माओवादी न्वकू डा. बाबुराम भट्टराईं शान्ति व संविधानय् केन्द्रीत जुयाः सहमति यायेमाःगु धयादिल । वय्कलं दलत दथुइ सहमतिया विकल्प मदुगु धयादिसें प्राप्त उपलब्धिया निंतिं दलत दथुइ सहमति जुइ हे माःगु धयादिल ।
तुच्चा ज्याझ्वलय् थीथी दलया नेतात, कुटनीतिक नियोगया प्रतिनिधि, पार्टीया कार्यकर्ता, पत्रकार लगायतं ब्वति काःगु दु ।
