बस्नेतया कार्यकाल थप याःगु प्रति ओएचसिएचआरया ध्यानाकर्षण
मानवअधिकार हनन् नापं थीथी द्वपं लानाच्वंम्ह महासेनानी राजु बस्नेतया कार्यकाल २दँ थप याःगु विषययात कयाः संयुक्त राष्ट्रसंघीय मानवअधिकार उच्चायुक्तया ज्याकूथीं थःगु ध्यानाकर्षण जूगु खँ धाःगु दु ।
नेपाली सेनाया महाराजगञ्ज स्थित भैरवनाथ गणया प्रमुख दुगु इलय् बन्दीत बेपत्ता जूगु, कुनातःपिं बन्दीतय्त यातना बीगु ज्या थंज्याःगु गम्भीर मानवअधिकार उल्लंघन याःम्ह बस्नेतया कार्यकाल थप याःगु धासें ओएचसिएचआरं च्यूताः प्वंकूगु खः ।
उच्चायुक्तया ज्याकूथिं शुक्रवाः छगू विज्ञप्ति पिथना थंज्याःगु ज्यां द्वन्द्व पीडिततय् न्याय सुनिश्चि यायेगु ज्या पाखें छगू पलाः ल्यूने वनीगु धासें थुकी पुनबिचाः यायेत इनाप याःगु दु । नापं मानवअधिकार उल्लंघनया ज्याय् संलग्न जूपिनि कार्यकाल थप वा बढुवा यायेगु ज्या पारदर्शी व निष्पक्ष अनुसन्धान मजुइकं मयायेत नं इनाप याःगु दु ।
