'शान्ति प्रकृया पूमवंक माओवादी नेतृत्व मज्यू'

संघीय मामिला, संस्कृति, संविधानसभा तथा संसदीय व्यवस्था मन्त्री मिनेन्द्र रिजालं शान्ति प्रकृया पूमवंकं माओवादी नेतृत्वया सरकार स्वीकार यायेमफइगु धयादीगु दु । वय्कलं माओवादी लडाकूत पूर्ण रुपं विशेष समितिया मातहत जुइमाःगु व शान्ति प्रकृयायात निष्कर्षय् थ्यंके धुंकाः जक माओवादीं सरकारया नेतृत्व याये योग्य जुइगु धयादिल ।

नेपाल प्रेस युनियनं इमालय् शुक्रवाः याःगु पत्रकार सम्मेलनय् वय्कलं सहमतिया मंकाः संयन्त्रं जक बजेट हयेमाःगु धयादीगु दु । राजनीतिक गतिरोधया कारणं सर्वसाधारणं दुःख सिइमाःगुलिं राजनीतिक दल तुरुन्त सहमतिलय् वयेमाःगु धयादिल ।

सरकारं न्ह्यब्वःगु पेस्की बजेट फुइधुंकूगुलिं याकनं पूर्ण बजेट महयेगु खःसा देय् ठप्प जुइगु ख्याच्वः नं वय्कलं बियादिल ।