एक्स्पोलय् ब्वति कायेत प्रचण्ड चीन प्रस्थान

चीनया सांघाईलय् जुयाच्वंगु सांघाई वर्ल्ड एक्स्पो २०१०य् ब्वति कायेत एनेकपा (माओवादी)या नायः पुष्पकमल दाहाल 'प्रचण्ड' शुक्रवाः चीन प्रस्थान यानादीगु दु । एक्स्पोया ग्वसाः खलया ब्वनाय् प्रचण्ड शुक्रवाः चाइना इन्टरनेसनलया विमानं उखे पाखे झायादीगु खः ।

प्यन्हुन्यंकया चीन भ्रमणय् प्रचण्डं एक्स्पोलय् सम्बोधन याइगु नापं चिनियाँ कम्युनिष्ट पार्टीया नेतात नाप नं खँल्हाबंला यानादीगु ज्याझ्वः दु । चीन झाये न्ह्यः विमानस्थलय् पत्रकारत नाप खँल्हाबंला यानादिसें प्रचण्डं चिनियाँ नेतातय् नापलयेगु ज्याझ्वः अन हे वनेधुंकाः जक क्वःछीगु धयादिल ।

वय्क नापं माओवादी विदेश विभाग प्रमुख कृष्णबहादुर महरा, पोलिटब्यूरो दुजः अग्नि साप्कोटा व स्वकीय सचिव समीर दाहाल नं उखे पाखे प्रस्थान यानादीगु दु ।