ग्वाहालि पुचःया मुँज्या निष्कर्षविहिन

येँ (सन्ध्या टाइम्स)/संविधान निर्माणया विवाद ज्यंकेत गठन याःगु उच्चस्तरीय कार्यदलयात ग्वाहालि यायेत न्हय्गू दलया नेतातय् दथुइ थौं सुथय् च्वंगु मुँज्या विना निष्कर्ष क्वचाल। थौं सुथय् राज्य व्यवस्थापिकाया ज्याकू सिंहदरवारय् च्वंगु मुँज्याय् न्यायपालिका सम्बन्धी सहलह जूसां दलया नेतातय्सं थःथःगु अडान तःगुलिं विनानिष्कर्ष क्वचाःगु खः। मुँज्याय् एकीकृत माओवादीं राजनीतिक विषययात ब्याख्या यायेगु अधिकार व्यवस्थपिका अन्तर्गत विशेष समितियात दयेमाःगु धकाः अडान तःगु खःसा कांग्रेस, एमाले नापं मेमेगु दलया नेतातय्सं धाःसा शक्तिपृथकीकरणया सिद्धान्त कथं न्यायपालिका स्वतन्त्र जुइमाः धकाः अडान तयेवं अथे निष्कर्षविहिन जूगु खः ।