विज्ञान संग्रहालयय् विज्ञान मन्त्री

नेपालय् स्वीस्वदँ न्ह्यः नीस्वंगु नेपाःया जैविक विविधतां जाःगु प्राकृतिक विज्ञान संग्रहालयया भ्रमणय् झाःम्ह वातावरण विज्ञान तथा प्रविधि मन्त्री गणेश साहं संग्रहालय बारे जनमानसय् प्रचार मजूगु खँय् आश्चर्य प्वंकादीगु दु । नेपाः प्राकृतिक रुपं तःमि जु धकाः न्ह्याक्वः हालाच्वंसां वन्यजन्तु वनस्पति लापाचा की सर्प औषधीजन्य वनस्पति पंछि पँया प्रजाति जनजाति विज्ञानया सामग्री दुर्लभ स्तनधारी प्राणी अस्थिपाजर आदिपाखें अपार तःमि जुयाच्वंगु राजधानीया हे विश्व सम्पदाया रुपय् लानाच्वंगु थुगु संग्रहया बारे जनमानस सभासद् मन्त्रालय सचिव तःधंपिं कर्मचारी व्यापारी स्वयम सेवक आदिया अभिरुची म्हो जूगुलिं याना सभासद् व मन्त्रीतय्सं संग्रहालय भ्रमण मयासें मजिउगु बिचाः प्यंकादिल ।

संग्रहालयया प्रमुख डा. केशव श्रेष्ठं नेपाःया मौलिक जैविक विविधता वनस्पति संरक्षण यायेगु व संरक्षण जागरण यायेत शैक्षिक ज्याझ्वः न्ह्याका वनेगु संग्रहालयया ज्याझ्वः जुयाच्वंगु खँ कनादिल । विज्ञान मन्त्री गणेश साहं अन भ्रमण यायेधुंकाः प्रधानमन्त्रीं नं उगु संग्रहालय स्वयेमाःगु खँ कनादिल । संग्रहालयया विज्ञ करन शाह पुष्पकेशरी श्रेष्ठ भैया खनाल नापं समाजसेवीपिं गोबिन्दमान मास्के सूर्यबहादुर मुल्मी प्रा. धर्म डंगोल सुरेश शाह ईला श्रेष्ठिपंसं नं वन वनस्पति व जागरण सम्बन्धय् जानकारी कयादिल । भ्रमण लिपा मन्त्री साहं उगु संग्रहालय वातावरणया संरक्षणया निंतिं तसकं हे ज्या वःगु थाय् जूगुलिं नियमित तालिम व जागरण ज्याझ्वःत न्ह्याकाः नागरिक व राजनीतिक ज्यक्तितय्सं तकं प्रत्यक्ष थःगु देय्या गौरव अप्वयेकीगु थज्याःगु भिंगु ज्याय् लगे जुइमाःगु न्ह्यथनादिसें थुगु संग्रहालययात ईमिडीयाय् यंकेगु निंतिं मन्त्रालयं तकं प्रचार यायेत पहल यायेगु खँ कनादिल ।