कुथुबहिली तःमुँज्या

ख्वप(सन्ध्या टाइम्स)/स्वीक्वःगु नेपालभाषा साहित्य तःमुँज्या कुथुबही भार्वाचोय् म्हिगःनिसें न्ह्यात। तःमुँज्या स्थानीय बयोबृद्ध नारायणभक्त खत्रीं बाजं व माकः प्याखंया दथुइ उलेज्या यानादीगु खः। मूपाहां नेमकिपाया अध्यक्ष नारायणमान बिजुक्छेँ रोहितं तःधंगु पार्टीया जातीय राज्य, संघीय संरचना व पूँजीवादी सोच थेंज्याःगु गलत नीति विरुद्धया संघर्षय् अन्तत सर्वहारा वर्गं न्ह्याकाच्वंगु सही नीति हे त्याइगु विश्वास प्वंकादिल ।

नेमकिपाया केन्द्रीय सचिव सुनिल प्रजापतिं तीन प्रतिशतया संवैधानिक प्रावधान पंचायती सोच हे जूगुलिं उकियात खारेज यायेमाः धासें नेमकिपा जिल्ला एकाईत यथावत यायेमाःगु पक्षय् दुगु खँ कनादिल ।

पुलांम्ह राजनीतिज्ञ रामहरि जोशीं थीथी राजनीतिक पार्टीया दथुइ थीथी विमतित कायम दुसां समाधानया ताःचा धाःसा राजनीतिक पार्टीया ल्हातय् हे लानाच्वंगु खँ कुलादिल। वरिष्ठ पत्रकार भैरव रिसालं फुक्कं राजनीतिक दलया नेतातय्त छगू हे ल्याखं स्वयेगु नं मिले मजू धयादिल ।

जलश्रोतविद् रामेश्वरमान अमात्यं आम जनतायाके राजनीतिक चेतना ब्वलने मफुतले देशय् अन्यौल नं न्यनाच्वनीगु न्ह्यथनादिसें भिंम्ह मनू निर्वाचित यायेगु ज्याय् जनता हे सचेत जुइमाःगु बिचाः प्वंकादिल। इतिहासकार प्रा. डा. पुरुषोत्तमलोचन श्रेष्ठं भार्वाचो लागा कालिगढतय्गु लागा जूगु न्ह्यथनादिसें थथुबही व कुथुबहीया शिलालेखतय्गु महत्व बारे ध्वाथुइकादिल। ज्याझ्वलय् साहित्यिक रचना बाचन नं जूगु खः ।

शारदा उच्च माविया प्राचार्य उद्धव सुजखूया सभापतित्वय् जूगु न्हापांगु दिंया ज्याझ्वलय् अधिवक्ता बालकृष्ण न्यौपाने, बीरगञ्जया इन्द्रमान रंजित, सहकारीविद् कैलाशभक्त प्रधानाङ्ग, साहित्यकार डी. आर. पोखरेल, पञ्चकृष्ण दली व नेपालभाषा साहित्य तःमुँज्या मूगुथिया नायः कान्छा बासुकलापिंसं न्ववानादीगु खः। ग्वसाः खलःया नायः लक्ष्मीनारायण राजलवट खत्रीया लसकुस न्वचुं न्ह्याःगु ज्याझ्वलय् नेपालभाषा साहित्य तःमुँज्याया पुलांम्ह छ्याञ्जे कृष्णसुन्दर तुल्सीया लुमन्तिइ स्वीद्वः व न्यासः दां अक्षयकोषय् तयेत शोभा जाकिबञ्जारं तःमुँज्याया नायः कान्छा बासुकलायात लःल्हानादीगु खःसा टोखाया सूर्यमान श्रेष्ठं नं तःमुँज्यायात स्वीद्वः तका दां हस्तान्तरण यानादीगु खः। बहनी च्याताः इलय् थीथी सांस्कृतिक ब्वज्या नं जूगु खः ।