गतिरोध चीकेत सल्लाह, सहमति व विश्वास आवश्यक : प्रम
राजनीतिक गतिरोधया कारणं आर्थिक गतिरोध : प्रकाश
प्रधानमन्त्री माधवकुमार नेपालं राजनीतिक दलत दथुइया गतिरोध चीकेत सल्लाह, सहमति व आपसी विश्वास आवश्यक जूगु खँ धयादीगु दु ।
रिपोर्टर्स क्लबं मोहनिया लसताय् येँय् याःगु तुच्चा ज्याझ्वलय् पत्रकारत नाप खँल्हाबंला यानादिसें प्रधानमन्त्री नेपालं गतिरोध चीकेत गम्भीर सहलह आवश्यक जूगु धयादिसें विश्वासया वातावरण वने जुसाः सहमति जुइगु धयादिल ।
पत्रकारत नाप प्रधानमन्त्री खँल्हानाच्वंगु इलय् नापं दीम्ह माओवादी न्वकू नारायणकाजी श्रेष्ठ 'प्रकाशं' राजनीतिक गतिरोधया कारणं हे आर्थिक गतिरोध जुयाच्वंगु धयादिल । वय्कलं राजनीतिक गतिरोध क्वचायेवं आर्थिक गतिरोध नं मदइगु दावी यानादिसें दकलय् न्हापां राजनीतिक गतिरोध चीकेमाःगु धयादिल ।
वय्कलं आर्थिक समस्या तसकं हे गम्भीर जुसाः दक्वं राजनीतिक दलया सहमतिलय् बजेटया विकल्प मालेमाःगु धयादिल । तर वय्कलं याकनं न्हूगु सरकार गठन यानाः उकी सरकारयात बजेट हयेबी माःगु खँय् बः धयादिल ।
तुच्चा ज्याझ्वलय् नेपाली कांग्रेसया सभापति सुशील कोइराला, नेकपा (एमाले)या नायः झलनाथ खनाल, माओवादीया न्वाकू डा. बाबुराम भट्टराई, नेपाःया निंतिं भारतीय राजदुत राकेश सुद लगायतया ब्वति दुगु खः ।
