'बजेटं सरकार हइगु मखु'
एकीकृत नेकपा (माओवादी)या न्वकू डा. बाबुराम भट्टराईं बजेटं सरकार हइगु मखसें सरकारं बजेट हइगु टिप्पणी यानादीगु दु ।
बिहीवाः येँय् जूगु छगू तुच्चा ज्याझ्वलय् पत्रकारत नाप खँल्हाबंला यानादिसें नेता भट्टराईं सरकार गठन यायेमाःगु इलय् वयाः बजेटया खँ ल्हानाः पंग थनाच्वंगु धयादिल । वय्कलं सहमतिलय् गठन जूगु न्हूगु सरकारं जक बजेट हयेफइगु दावी यानादिल ।
उखे बिहीवाः हे धनगढीइ जनआवाज एफएमया उलेज्या ज्याझ्वलय् डा. भट्टराईं अनमिनया म्याद क्वचाये न्ह्यः हे गतिरोध अन्त्य मजुल धाःसा शान्ति प्रकृया भंग जुइगु ख्याच्वः बियादिल । वय्कलं शान्ति प्रकृया भंग जुल धाःसा देय् हाकनं हिसांत्मक लँपुइ न्ह्याःवनीगु धयादिल ।
देय् हिंसात्मक लँपुइ न्ह्याःवन धाःसा विदेशी हस्तक्षेपं राष्ट्रियता हे धरापय् लायेफइगु सम्भावना दुगु धयादिसें वय्कलं देय्यात दुर्घटनां बचेयायेत राजनीतिक दलतय्सं थःथःगु अडान त्याग यायेमाःगु धयादिल ।
