शान्ति प्रकृया सन्तोषजनक अवस्थाय् मदु : ल्यानग्रेन
नेपाः स्थित संयुक्त राष्ट्रसंघीय राजनीतिक मिसन अनमिनया प्रमुख करिन ल्यानग्रेनं नेपाःया शान्ति प्रकृया सन्तोषजनक अवस्थाय् मदुगु धासें दुःख प्वंकादीगु दु । वय्कलं अनमिन नाप दुगु लडाकुतय् ल्याः सरकारयात उपलब्ध यायेधुंकाः नं लडाकु समायोजन प्रकृयाय् उलि प्रगति जुइमफुगु धयादिल ।
बिहीवाः एनेकपा (माओवादी)या नायः पुष्पकमल दाहाल 'प्रचण्ड' नाप जूगु खँल्हाबंलाय् ल्यानग्रेनं लडाकु समायोजन, सेना समायोजन विशेष समितिया ज्या, शान्ति प्रक्रिया नापंया बिषयलय् च्यूताः प्वंकादीगु खः । वय्कलं दलत दथुइया राजनीतिक गतिरोधया कारणं शान्ति प्रकृयाया ज्या न्ह्यये मफुगु नं धयादिल ।
खँल्हाबंलाय् ल्यानग्रेनं अनमिन आः याकनं लिहांवनीगु जूगुलिं क्वःछिनातःगु इलय् शान्ति प्रक्रिया व लडाकु समायोजनया ज्या क्वचायेकेमाःगु धासें च्यूता प्वंकूगु जानकारी माओवादी न्वकू नारायणकाजी श्रेष्ठ 'प्रकाशं' बियादिल ।
