प्रदेशय् छगू जक संसद तयेगु सहमति

संविधानसभा अन्तर्गत राज्यया शासकीय स्वरुपया निर्धारण समितिइ दुगु विवादित ११ मध्ये ९ बुँदाय् दलत दथुइ सहमति जूगु छन्हू लिपा थौं हानं मेगू छगू विषयलय् सहमति याःगु दु । न्हूगु संविधानय् जूगु विवादित विषयलय् सहमति यायेत गठन जूगु कार्यदलया बुधवाः च्वंगु बैठकं ब्यवस्थापिका अंगया स्वरुप निर्धारण सम्बन्धी समितिया प्रतिवेदनय् सहलह यानाः प्रदेशय् छगू जक संसद तयेगु खँय् सहमति याःगु दु ।

थौं सिंहदरबारय् च्वंगु बैठकं व्यवस्थापिका अंगया स्वरुप निर्धारण समितिया प्रतिवेदनय् दुगु १६ विवादित बिषयया बारे सहलह याःगु खः । उकि मध्ये प्रान्तय् छगू सदन तयेगुलिइ जक सहमति जूगु खः ।

समितिं मतदाताया दँ, निर्वाचन क्षेत्र नापंया बिषयलय् धाःसा दलत दथुइ अझ नं सहमति यायेमफूनी । समितिं निर्णय यायेमफुगु बिषयलय् शीर्ष नेतात च्वनाः निर्णय याइगु जूगु दु । थुकीया निंतिं शीर्ष नेतात दुथ्यागु कार्यदलया बैठक कन्हय् हानं च्वनीगु जूगु दु ।