काम चलाउ सरकारं हे बजेट हइ : संचारमन्त्री
सूचना व संचारमन्त्री शंकर पोखरेलं देशय् संकट ब्वलन धाःसा काम चलाउ सरकारं हे बजेट हइगु खँ धयादीगु दु ।
प्रमुख विपक्षी दल एनेकपा (माओवादीं) काम चलाउ सरकारयात बजेट हयेगु अधिकार मदुगु धकाः निर्णय याःगु छन्हु लिपाः बुधवाः येँ जूगु साक्षात्कारय् मन्त्री पोखरेलं काम चलाउ सरकारनाप बहुमत दुगुलिं देशय् संकट ब्वलंगु इलय् थ्वहे सरकारं बजेट हयेफइगु दाबी यानादिल ।
बजेट हयेगु बिषयलय् प्रमुख प्रतिपक्षी माओवादीनाप नं निरन्तर संवाद जुयाच्वंगु धयादिसें मन्त्री पोखरेलं माओवादीं विरोध याःगु भरय् फुक्कं इमिसं धाःथें मजुइगु धयादिल । वय्कलं देय् हे संकटय् लाइगु अवस्थाय् थ्यंसा थ्वहे सरकारं बजेट हयेगुया विकल्प मदुगु धयादिल ।
वय्कलं प्रधानमन्त्री माधवकुमार नेपालं राजीनामा बीवं फुक्क खँ मिलेजुइ धकाः दावी याःगु माओवादीं आः देशय् खनेदुगु जटिलताया जिम्मेवारी कायेमाःगु धयादिल । वय्कलं प्रधानमन्त्री चुनावया याकः उम्मेदवार रामचन्द्र पौड्यालं उम्मेदवारी लितकायेवं समस्या समाधान मजुइगु नं धयादिल ।
