ओमबहालय् छम्हेसित स्यानाबिल

येँया २३ नम्बर वडाय् लाःगु ओमवहालय् वंगु चान्हय् छम्ह ल्याय्म्हयात स्यानाब्युगु दु । येँया छगू माडवारी पसलय् ज्या याइम्ह दिलबहादुर थापामगर ओमबहालय् भाडाय् च्वनाच्वंम्ह खः । वंगु चान्हय् अय्ला त्वनाः क्वथाय् लिहांवयाच्वंम्ह थापामगरयात स्थानिय मनूतय्सं खुँ धका दाःगु सीदुगु दु । ओखलढुंगा स्थायी छेँ जूम्ह थापामगरयात दाया स्याःगु प्रारम्भिक अनुमान प्रहरीं याःगु दु ।

थापामगरयात वियरया वोटलं सुया: स्याःगुलिं आन्द्रा पिहांवःगु खँ धाःगु दु । सीम्हेसिया म्ह्यय् तच्वयेकं दायातःगु व प्वा: तज्याना आन्द्रा पिहांवःगु अवस्थाय् प्रहरीं थापामगरया सीम्ह लुइकूगु खः । थापामगरयात दाया: स्या:पिंसं हे वयात अन यगानातःगु जुइमाःगु अनुमान प्रहरीं याःगु दु । प्रहरीं घटनाया अनुसन्धान यानाच्वंसां आः तक सुयातनं ज्वने मफुनीगु खँ धाःगु दु ।